De Bewicker Bull

geschrieben von Johann Leupold im November 2015

Ok wenn dat Bardowick schreven warrt, utsproken warrt dat „Bardowiik“ – mit ’n langet i. Dat c vör dat k makt nämlich dat i lang un nich kort, dat is ut dat as dat up Hoochdüütsch is. Dat kannst du ok noch an annere Öörd seihn, an Brackede un Bleckede to’n Biespeel. Recht utsproken heet de nämlich Braakede un Bleekede. Un wenn du mi nu mit Hagenbeck komen wullst, denn laat ik mi nich verblüffen. Karl Hagenbeck kunn nix dagegen doon, dat ut sien langen -beek ’n kortet -beck worrn is. ’n echten Hambörger seggt jümmers noch „Hagenbeek“. Un wat hüüt Barmbek is, dat hett bit 1946 Barmbeck heeten, wieldat et an de „Barnebeke“ legen hett. Un wat ’ne Beke is, dat bruuk ik di ja nich to vertellen. So, nu schall nat aber noog wesen mit de Schoolmesterie. Hüüt geiht dat üm Bardowick, wat up Platt Bewick is! Bardowick – nu weitst du ja woans dat utsproken warrt, aber laat us man lever Bewick seggen – is een von de öllsten Öörd in Neddersassen un is keen Dörp aber ’n Flecken. Viellicht is de Naam von de olen Langobarden komen – de Wetenschop is da nich seker. Op jeden Fall is de Gegend von Bewick vör lange Tiet de „Bardengau“ ween un Bardowick weer woll de Hauptoort. An’n Anfang von dat negente Johrhunnert is Bewick so’ne Oort Kontroll-Stee för de Franken ween. All Kooplüüd, wenn se mit de Slawen up de annere Siet von de Elv Hannel dreben wullen, mössen dör Bewick. De Grote Karl is ja plietsch ween un he harr so’ne Oort „Kriegswaffenkontrollgesetz“ besloten un he harr verbaden, de goden fränkischen Wapen över de Grenz to bringen un dat schullen siene Lüüd in Bewick an den Övergang över de Ilmenau kuntrolleren. Bewick hett an de Ilmenau ’ne gode Laag hat. Bet dorhen kunnen de Scheep von de Elv ut fohren, un ahn Scheep is keen Hannel möglich ween – dat hett ja keen A 39 geven! So is denn Bewick na un na to ’n grotet un wichtiget Zentrum worrn. Un ok de Kark hett ’n grotet Bedüden hat. De Slawen, de up de anner Siet von de Elv wahnen, weern ja noch Heiden un hebbt missioneert warrn möten. Un so geev dat denn ’ne grote Kark, wo se „Dom“ to seggt un noch ’n poor annere Karken, de nich mehr staht. 972 hett Otto de I. Bewick sogor to ’ne Stadt maakt un de Bewickers kregen dat Toll- un dat Münzrecht, un se verdenen dör den Solt-Toll an dat Lümborger Solt.

Ok wenn dat Bardowick schreven warrt, utsproken warrt dat „Bardowiik“ – mit ’n langet i. Dat c vör dat k makt nämlich dat i lang un nich kort.

Aber von 1142 an güng dat anners. Denn keem Heinrich de Lööw an’t Regeren. Un de kunn sik Lübeck ünner de Fingernagels reten un he maak Lübeck to ’ne Stadt un Bewick harr nich mehr dat Bedüden as vörher. Un da weern de Bewickers natürlich nich goot up em to spreken un se wullen nich so as se schullen. So dach denn Heinrich, dat he de Bewickers wiesen mutt, keen de Chef is un dat he se to Räsong bringen mutt. Mit siene Suldaten wull he Bewick erobern. De Bewickers föhlen sik aber seker. Se harrn ja up de een Siet de depe Ilmenau, wo keeneen röver kunn un up de anner Siet harrn se ’n fasten un hogen Wall. So dachen se, se kunnen Heinrich ’ne Nees dreihn. Toeerst güng dat ok goot. Twee Daag duere dat Belagern, as mit’n Mal dör dat Lager von de Belagerers ’n Bull leep. De hett ja nu blot ut Bewick dör dat Ilmenauwater kamen kunnt. Da harr een von Heinrich siene Suldaten ’ne plietsche Idee. He segg to den Hartog: „De Bull schall uns wiesen, woans wi dör de Ilmenau in de Stadt kaamt. De Bull warrt ja woll de Furt kennen!“ Un as denn de Bull wedder na sienen Stall trüch wull, güngen Heinrich siene Suldaten eenfach achter em ran un kunnen so Bewick erobern un de schöne faste Stadt dalbrennen. Blot de grote Kark bleev stahn un Heinrich leet ’n lütten hölten Löven över de Döör stellen. Bewick verloor sien olet Bedüden un wurr wedder to’n Dörp. Froh weern de Bewickers da nich över un wenn blot jichtenseen von den verräterischen Bullen anfung, denn kunnen se heel gnadderig warrn. Dat is aver al lang vörbi un hüüt buut se sogor ut Blomen ’n schönen Bullen un treckt em bi ehr grotet Erntedankfest mit annere schöne Wagens dör den Flecken. Hüüt is Bewick beropen dör dat Grööntüüch, wat se dor anbuut. De hele Oort is as so’n schönen Gröönkram-Goorn. Du kannst dor von Bohnen un Kürbis över Sellerie un Spargel bit to Gröönkohl un Wörteln allet kregen, wat goot smeckt. De Bewicker Wörteln sünd heel beropen un darüm wählt se dor ok de „Wörtel-Königin“. ¶