Magazin über das Leben in Lüneburg
Themen
Alle Themen und Artikel

Iesenbahn in Lümborg

geschrieben von Johann Leupold im Juni 2015

Lümborg is ’ne rieke Stadt, dat weit jedeen. Se is sogor riek an Bahnhööv – tominnst freuher weer dat so. Du markst dat ja seker: Hüüt schall dat mal üm de Bahn in Lümborg gahn.
Den Hauptbahnhoff in Lümborg warrst du ja woll kennen. De Vörplatz is mit siene veelen smucken Fahrrööd de „Visitenkoort“ von de Stadt. Aber laat us mal anfangen, de Bahnhööv to tellen. Wenn een ut den Hauptbahnhoff (dat is Nummer een) rut kümmt, denn kann’n up de anner Stratensiet al den Westbahnhoff (Nummer twee) seihn. Von dor güng de Bahn na Oost bit na Wittenbarge an de Elv un na West bit na Bookholt in de Nordheid. Denn gifft dat noch den Soltauer Bahnhoff (Nummer dree) un den Bleckeder Bahnhoff (Nummer veer). De Streck na Lübeck hett keen egen Bahnhoff, de Töög feuhrt von’n Hauptbahnhoff af. So hett Lümborg veer utwossen Bahnhööv un noch ’n halven un hett as so’ne Spinn in’t Iesenbahn-Nett setten.
De Westbahnhoff süht staatsch ut, is hüüt aber gor keen Bahnhof mehr. Buut worrn is dat Huus so in de 1870er Johrn för de „Wittenbarge-Bookholter Bahn“. Mit de hett se mal von Berlin bit na Bremerhoben feuhrn wullt. Hüüt geiht dat blot noch von Dannenbarg bit na Lümborg. De schöne, lange Brüch bi Dömitz öber de Elv is ja twei un up de Oostsiet von de Elv sünd sogor de Schenen afreten. Liekers hefft se in Dömitz noch ’ne „Bahnhofstraße“ un ’ne Straat, de „Am Bahndamm“ heet. In de letzten Johrn hett de Streck von Lümborg na Dannenbarg – de ole „Wittenberger Bahn“ ok ’n niegen Naam kregen: Wieldat se in’t Wendland geiht, warrt se von veel Lüüd „Wendlandbahn“ nöömt.
Na West hest du mit de „Wittenbarge-Bookholter Bahn“ bit na Bookholt in de Noordheide feuhrn kunnt. För de Lümborgers is dat de „Bookholter Bahn“ ween. Ik kann mi noch an den smucken Schienenbus erinnern, mit den ik geern na Marxen na’n Schüttenfest feuhrt bün. An jeden Feldweg hett he tröten mösst un he holl ok an’n Sternkamp in Lümborg. In Wulfsen hett he meist ’n beten länger stahn. Wulfsen is ja ’n Ümsteeg-Bahnhoff ween. Da krüüz sik de Bookholter Bahn mit de Bahn von Hützel na Winsen. 1981 feuhr denn de letzte Tog up düsse Streck un de Schenen wasst langsam to.
Wenn du de Bahnhofstraat dalgeihst, denn löppst du up dat Backsteen-Huus to, wo de „Soltauer Bahnhoff“ in weer. De Straat heet aber „An der Wittenberger Bahn“. Glieks achter dat Huus güng de „Noorddüütsche Gebirgsbahn“ los. De hett se so nöömt, wieldat de Schenen mehr up un dal güngen as normalerwies. Von dor hest du mit’n Tog na de Haltestee „Kurpark“ oder na Oedeme oder Rettmer un sogor na Heinsen feuhrn kunnt. Later denn stunnen dor de olen Iesenbahnwagens, de de „Verkehrsfreunde Lüneburg“ wedder trechtmakt hett. Se sünd denn af un to ok dormi bit na Bisping un sogor na Egestörp feuhrt.
Nu kümmt de Bahn, von de de mehrsten Lüüd woll nich weet, dat et se gifft un wo ehr Bahnhoff is: Dat is de „Bleckeder Bahn“. Dat Huus steiht noch, de Schenen sünd noch dor un de Straat heet jümmers noch „Am Bleckeder Bahnhof“. Dat is ’n scheunen Bahnhoff ween mit allet, wat da to höört: Wartesaal, Güterabfertigung, Lokschuppen un „Tante Meier“. As düsse Bahnhoff to de „Osthannoversche Eisenbahn AG“ hör, hett he „Lüneburg Nord“ heeten. Up de Schenen steiht nu af un to een von de olen Töög von de „Verkehrsfreunde Lüneburg“. Mit den kann een na Bleckede feuhrn. Kiek di mal de Internet-Siet „www.heide-express.de“ an, da finnst du, wannehr se feuhrt. De kommodige Fohrt geiht öber Scharnebeck un Boltersen bit na Bleckede.
De Lümborger Hauptbahnhoff liggt an de Hauptstreck von Hannober na Hamborg. De is von de „Königlich Hannöverschen Staatseisenbahnen“ bit Harborg buut un 1847 fardig worrn. Aber ierst 1872 kunnen de Töög öber de niege Elvbrüch na Hamborg feuhrn. 140 Töög an’n Dag feuhrt da längs; na Hannober, na Hamborg un ok na Lübeck. För Dusende von Lüüd is dat de beste Weg to ehr Arbeitsstee in Hamborg. Frachttöög rappelt as doll un de ICE jaagt vörbi. Twüschen Hannober un Hamborg feuhrt so veel Töög, dat twee Gleis nich langt. In de letzten Johrn hett de Bahn an welk Steen sogor veer Gleis buut, üm de veelen Töög da dör to kregen.
Von Gleis fief kannst du von Lümborg binah alle Stünn na Lübeck feuhrn. Von 1864 bit 1878 hett se de Töög mit’n Schipp över de Elv bi Hohnstörp brocht. Hüüt gifft dat dor ’ne Brüch. ¶

Foto: Sammlung Hajo Boldt

Anzeige