Magazin über das Leben in Lüneburg
Themen
Alle Themen und Artikel

Senkungsgebiet

geschrieben von Johann Leupold im Mai 2015

Keen mit apen Oogen dör Lümborg geiht, de warrd wiss al seihn hebben, dat dat een or anner Huus ’n beten scheef steiht. Af un to kann dat ok ween, dat ’ne Straat afsparrt warrn mutt, wieldat da ’n grotet deepet Lock in is. Jüst nu is de Frommestraat afsparrt un de Stadt hett da ’n hogen Tuun üm dat Lock buut, wo de Eer in de letzten Johrn afsackt is. Dat hangt mit dat Solt in’n Ünnergrund tohop, wo Lümborg vör lange Tiet mal mit riek worrn is. All siet öber 100 Johrn hett sik aber wiest, dat dat nich de allerbeste Idee ween is, up Solt to buen! Harrn de olen Lümborgers dat wusst, denn harrn se ehr Hüüs seker nich so dicht an den Kalkbarg buut. Rund üm den Kalkbarg gifft dat nämlich dat „Senkungsgebiet“. Da blifft de Grund nich still liggen, as annerswo. Da sackt de Grund af un dat nich to knapp un keen kann weeten, wo dat sackt un woveel dat sackt. Vör veele Johrdusend is ganz Norddüütschland ’n Meer ween. Dat is so rund 250 Millionen Johr her (ik kann mi da nich an erinnern!). Dat veele Soltwater is denn aber öber de Johrdusende uttrocknet un davon is denn Kalk un Gips un Kali un Solt in dicke Lagen öberbleben. Öber düsse Lagen hett sik denn wedder Ton un Kalk un Sand leggt un da is denn Sandsteen ut worrn. As nu de swore Last von den Sandsteen up dat Solt in’n Ünnergrund drück, da wurr dat Solt „plastisch“ un wo de Deck öber dat Solt nich so dick un de Last nich so swor weer, wurr dat Solt hoch drückt. Du kannst di dat licht vörstellen, wenn du barfoot in Mudd peddst. Da drückt sik denn de Mudd twüschen diene Tehn na baben. Jüst so warrt ok dat Steensolt, mit all dat wat da up liggt, von deep ünner de Eer na baben drückt. Bi Steensolt seggt de Wetenschop da denn „Salzstock“ to. De hett ’n „Hoot“ uphat, as he updüker. Nich een to’n „Goden Dag“-Seggen! De Hoot is de Gips ween, de öber dat Solt legen hett un den dat Solt mit na baben böhr. Nu is de Hoot de schöne „Kalkbarg“, to den wi aber eegentlich „Gipsbarg“ seggen mööt. Deep ünner den Kalkbarg is de Soltstock. Mit dat Updükern kreeg de Soltstock denn aber ’n Problem. He wurr nämlich so hooch drückt, dat dat Grundwater da öber wegspööl. Un Water kann dat beste Solt nich uthollen. Krümel mal ’n beten Solt in Water, denn kannst seihn, wat passeert. Un darüm gifft dat da, wo de Soltstock deep in’n Grund is, dat „Senkungsgebiet“. An dat Problem mit dat Water harrn aber de olen Lümborgers nich dacht, de ehr Hüüs baben öber den Soltstock buut harrn. Un se harrn von Naholligkeit un von „Kosten-Nutzen-Reknung“ keen Ahnen, un se fungen darüm sogor noch an, dat Soltwater ut de Eer to halen. Se kaken da Solt ut un verköpen dat wiet in de Welt un wurrn da rieke Lüüd dör – na, up jeden Fall wurrn de riek, de dat Seggen harrn. Mit de Tiet verswunn so jümmers mehr von dat Solt, wat in’n Ünnergrund weer. Veel wurr dör dat Grundwater afspöölt aber ’n groot Deel pump ok de Lümborger Saline af. Veele, veele dusend Tonnen Solt fehlen denn achterna. Un wo dat Solt in’n Grund fehl, da sack de Eer na un de Hüüs sacken mit. An’n Leegsten weer dat an’n Rand von dat Senkungsgebiet oder da wo dat hollig ünner en Huus weer. Hüüs stunnen scheef, dat Muerwark kreeg Reten, Finster un Dören leten sik nich mehr up un nich mehr to maken, Tegel fullen von’t Dack un binah tweehunnert Hüüs hett ganz afreten warrn mösst. An’t Enn von de Grapengeter-Straat – „Veer Oorten“ heet dat da – kann een seihn, wo deep de Grund sackt is. Un de olen Hüüs, de an de Westsiet von de „Niege Sült“ steiht, seiht ut, as wenn se na achtern kippt. Se steiht jüst an de Grenz von dat „Senkungsgebiet“. Vörn an de Straat is de Grund fast un achtern sackt he dal un keen na de Straat ut’t Finster kieken will, de mutt bargan gahn. In de Frommestraat steiht ’n annern „Senkungsschaden“, de Rest von dat „Tor zur Unterwelt“. Twee muerte Pielers heurten to den Ingang von en Huus, dat al lang afreten is. Se sünd siet 1898, as se buut wurrn, so bi twee Meters dalsackt un een Meter to Siet schaben. Gah up dienen Stadtrundgang da mal hen. Du kannst dat Grusen kregen, wenn du dat deepe Lock sühst. ¶

Anzeige